swagat01
સાયરાબાનુ અનેક ગુનામાં સંડોવાયેલી છે
અમદાવાદના નારોલ વિસ્તારના ગણેશનગરમાં ગેરકાયદેસર જુગાર ચલાવતી કુખ્યાત ‘લેડી ડોન’ તરીકે ઓળખાતી સાયરાબાનુ પઠાણ સહિત 14 આરોપીઓને નારોલ પોલીસે રંગેહાથ ઝડપી લીધા છે. ટોરેન્ટ પાવરની ઓફિસ નજીક ખુલ્લી જગ્યામાં બેરોકટોક જુગાર રમાડવામાં આવતો હોવાની બાતમીના આધારે પોલીસે દરોડો પાડયો હતો. દરોડા દરમિયાન જુગાર રમતા તમામ આરોપીઓની ધરપકડ કરી પોલીસે કુલ રૂ. 2.72 લાખનો મુદ્દામાલ કબજે કર્યો છે.
પોલીસ મુજબ, સાયરાબાનુ પઠાણ નારોલ વિસ્તારમાં લાંબા સમયથી પોલીસ માટે માથાનો દુખાવો બની હતી. વર્ષ 2019થી તેના વિરુદ્ધ હત્યાનો પ્રયાસ, લૂંટ, ધમકી, ખંડણી અને મારામારી જેવા ગંભીર ગુનાઓ નોંધાયેલા છે. પોતાને ‘લેડી ડોન’ માનતી સાયરાબાનુ ફરીથી ગણેશનગર વિસ્તારમાં જુગારની પ્રવૃત્તિ શરૂ કરી હોવાની માહિતી પીએસઆઈ આર.ડી. સાંબડને મળી હતી. આ અંગે ઇન્સ્પેક્ટર પરિમલ દેસાઈને જાણ કરાતા તરત જ ટીમ બનાવીને રેઈડ કરવામાં આવી હતી.
પોલીસ તપાસમાં વધુમાં ખુલ્યું છે કે સાયરાબાનુના પરિવારના ત્રણેય સંતાનો પણ ગુનાઈત પ્રવૃત્તિઓમાં સંડોવાયેલા રહ્યા છે. મારામારી. ચેઇન સ્નેચિંગ, લૂંટ અને ખંડણી જેવા ગુનાઓમાં તેમનો નામ અગાઉથી નોંધાયેલો છે. તાજેતરમાં જ તેના ત્રણ દીકરામાંથી એક ચેઇન સ્નેચિંગના ગુનામાં જેલમાંથી બહાર આવ્યો હતો. તે વચ્ચે તેની માતા સાયરાબાનુ ફરી એક વખત જુગારના કેસમાં ઝડપાઈ જતાં વિસ્તારમાં ચર્ચાનો વિષય બની ગઈ છે. નારોલ પોલીસે કાયદેસરની કાર્યવાહી હાથ ધરી છે.
