swagat01
કણભા GIDC બાકરોલ રોડ પર આવેલી શિવાની સ્ટેટમ્પ નામની એક ફેક્ટરીમાં ગેરકાયદેસર રીતે પ્રતિબંધિત પ્લાસ્ટિક ઝભલાંનું ઉત્પાદન થતું હોવાના ગંભીર આક્ષેપો સામે આવ્યા છે. મળતી માહિતી મુજબ, આ ફેક્ટરી ગુજરાત પ્રદૂષણ નિયંત્રણ બોર્ડના કયા નિયમો અથવા પરવાનગીઓ હેઠળ ચાલી રહી છે તે બાબતે સ્પષ્ટતા જોવા મળતી નથી.
ફેક્ટરીમાં મોટા પાયે પ્રતિબંધિત પ્લાસ્ટિક કોથળીઓનું ઉત્પાદન કરવામાં આવી રહ્યું હોવાનું જણાવાય છે, જે રાજ્ય અને કેન્દ્ર સરકારના નિયમોના સીધા ઉલ્લંઘન સમાન છે. ફેક્ટરીના સંચાલક તરીકે હિરલ શાહનું નામ સામે આવ્યું છે, જેમના દ્વારા નિયમોની ખુલ્લેઆમ અવગણના કરવામાં આવી રહી હોવાનું સ્થાનિકો કહે છે.
વિશેષ વાત એ છે કે ફેક્ટરીનું શટર બહારથી લોક રાખવામાં આવે છે, જ્યારે અંદર ચારથી પાંચ કામદારો કોઈપણ પ્રકારની સલામતી વ્યવસ્થાઓ વિના કામ કરી રહ્યા છે. આ સ્થિતિ કામદારોના આરોગ્ય અને સલામતી માટે ગંભીર જોખમ ઊભું કરે છે, સાથે સાથે પર્યાવરણને પણ નુકસાન પહોંચાડે છે.
સ્થાનિક નાગરિકો અને સામાજિક કાર્યકરો દ્વારા સંબંધિત વિભાગો પાસે માંગ કરવામાં આવી રહી છે કે આ ફેક્ટરી સામે તાત્કાલિક તપાસ હાથ ધરવામાં આવે અને જો નિયમોના ભંગની પુષ્ટિ થાય તો કડક કાર્યવાહી કરવામાં આવે. હવે જોવાનું રહ્યું કે GPCB અને પ્રશાસન આ મામલે શું પગલાં લે છે.
