swagat01
અમદાવાદના વાડજ પોલીસ સ્ટેશનની કામગીરીને લઈ ગંભીર બેદરકારીનો મુદ્દો સામે આવ્યો છે. પ્રાપ્ત માહિતી મુજબ 15 જાન્યુઆરીના રોજ બપોરે આશરે 1 વાગ્યાની આસપાસ કન્ટ્રોલ રૂમમાં એક મેસેજ મળ્યો હતો કે વાડજ વિસ્તારમાં બે ઇસમો ચાઈના દોરીથી પતંગ ચગાવી રહ્યા છે.
આ માહિતીના આધારે પોલીસ તાત્કાલિક સ્થળ પર પહોંચી તપાસ હાથ ધરી હતી. તપાસ દરમિયાન બંને ઇસમો સ્થળ પર હાજર હોવાનું જણાતા પોલીસ દ્વારા તેમની અટકાયત કરવામાં આવી હતી. જોકે, આ કાર્યવાહી દરમિયાન એક ગંભીર ચૂક સામે આવી છે.
પોલીસ દ્વારા નોંધાયેલ FIRમાં બાતમી આપનાર વ્યક્તિનું નામ અને મોબાઇલ નંબર જાહેર કરી દેવામાં આવ્યા હોવાનું સામે આવ્યું છે. સામાન્ય રીતે બાતમીદારની ઓળખ ગુપ્ત રાખવાની હોય છે, જેથી તેમની સુરક્ષા જળવાઈ રહે અને ભવિષ્યમાં લોકો નિર્ભયપણે માહિતી આપી શકે. આ નિયમનો ભંગ થવાથી પોલીસની કામગીરી પર ગંભીર સવાલો ઉભા થયા છે.
આ ઘટનાને લઈને સ્થાનિક સ્તરે ચર્ચા શરૂ થઈ છે અને જવાબદાર અધિકારીઓ સામે યોગ્ય કાર્યવાહી કરવાની માંગ ઉઠી છે. હવે જોવાનું રહ્યું કે ઉચ્ચ અધિકારીઓ આ મામલે શું પગલાં લે છે અને આવી બેદરકારી ફરી ન બને તે માટે કઈ વ્યવસ્થા કરવામાં આવે છે.
