swagat01
પોલીસે 9.94 લાખના મુદ્દામાલ સાથે આરોપીની ધરપકડ કરી
શહેરનાવટવા વિસ્તારમાંસિન્થેટિક નશો કરનારા લોકોમાં વપરાતી પ્રતિબંધિત ચીજવસ્તુઓના મોટા જથ્થાનો પર્દાફાશ થયો છે. વટવા પોલીસે રઘુવીર પ્લેટીનીયમ એસ્ટેટમાં આવેલા એક ગોડાઉન પર દરોડો પાડીને ગોગો સ્મોકિંગ કોન અને રોલિંગ સ્ટ્રીપના કુલ 1.30 લાખ નંગ જેટલા જથ્થા સાથે એક આરોપીની ધરપકડ કરી છે. જપ્ત કરાયેલા મુદ્દામાલની અંદાજિત કિંમત રૂ. 9.94 લાખ હોવાનું પોલીસ દ્વારા જણાવાયું છે.
પોલીસની પ્રાથમિક તપાસમાં ખુલ્યું છે કે આરોપી અતુલ ચૌહાણે ખાસ કરીને આ પ્રતિબંધિત ચીજવસ્તુઓના વેચાણ માટે ગોડાઉન ખરીદ્યું હતું. એટલું જ નહીં, ગોડાઉનની બહાર પાનનો ગલ્લો ચલાવીને ત્યાં આવતા ગ્રાહકોને સહેલાઈથી ગોગો સ્મોકિંગ કોન અને રોલિંગ સ્ટ્રીપ પૂરા પાડતો હતો. જેથી કોઈને શંકા ન જાય. બાતમીના આધારે વટવા પોલીસ સ્ટેશનના સેકન્ડ ઇન્સ્પેક્ટર એચ.ડી. સોઢા અને પીએસઆઈ એ.બી. ગંધાની ટીમે દરોડો પાડયો હતો અને ગેરકાયદેસર જથ્થો ઝડપી લીધો હતો.
આટલી મોટી માત્રામાં પ્રતિબંધિત સામાન મળતા પોલીસે આશંકા વ્યક્ત કરી છે કે આરોપી માત્ર સ્થાનિક સ્તરે નહીં પરંતુ ગુજરાત બહાર પણ આ સામાનનું હોલસેલમાં વેચાણ કરતો હોઈ શકે છે. હાલ વટવા પોલીસે આરોપી વિરુદ્ધ જાહેરનામા ભંગ સહિતના ગુનાઓ હેઠળ કાર્યવાહી કરીને તેની સઘન પૂછપરછ શરૂ કરી છે. સાથે સાથે આ જથ્થો ક્યાંથી લાવવામાં આવતો હતો તે દિશામાં પણ તપાસ તેજ કરવામાં આવી છે.
