swagat01વટવા સદભાવના નગરમાં રહેતો 40 વર્ષીય શહેનશાહ ઉર્ફે મુન્નો અખ્તર શેખ શાહઆલમ દરગાહ પરિસરમાં પાથરણા લગાવીને રમકડા વેચવાનો વેપાર ધંધો કરે છે. ગત તા.9 જૂલાઈના રોજ વરસાદ વધુ હોવાથી યુવકે જ્યાં પાથરણાં લગાવીને ધંધો કરતો હતો, ત્યાં તપાસ કરવા ગયો હતો કે વરસાદના લીધે તેની જગ્યામાં પાણી ભરાઈ ગયા છે કે નહી. દરમિયાન તેની સામે વેપાર કરતી મહિલાએ આવીને તે મારા દીકરાના રૂપિયા અને મોબાઈલ ચોરી લીધા છે કહીને તેની સાથે ઝઘડો કરવા લાગી હતી.
યુવકે ઇનકાર કર્યો કે તેણે કોઈનો ફોન કે પછી રૂપિયા ચોર્યા નથી તેમ છતાં ફીઝાબાનુ અંસારી, તસ્લીમાબાનુ અંસારી તથા ઈસ્તીખાન અંસારીએ ત્રણેયે ભેગા મળીને રમકડા વેચીને ગુજરાન ચલાવતા યુવકને બેરહેમી પૂર્વક લાકડાના ડંડાના 24 ફટકા મારીને માથું ફોડી નાંખ્યું હતું. દરગાહના પરિસરમાં લોકોના ટોળા એકઠા થઇ જતા મામલો થાળે પડાવ્યો હતો. યુવક રીક્ષામાં બેસીને ત્યાંથી સારવાર માટે હોસ્પિટલ ગયો હતો. બીજી તરફ ફીઝાબાનુ અંસારી અને તસ્લીમાબાનુ અંસારી બંને મહિલાઓ ભેગા મળીને યુવકને માર મારી રહ્યા હતા. તેનો વિડીયો બનાવીને અજાણ્યા શખ્સોએ સોશિયલ મીડિયામાં વાઈરલ કર્યો હતો. ત્યારબાદ ઇસનપુર પોલીસે ઈજાગ્રસ્ત યુવકની ફરિયાદ નોંધીને બે મહિલા સહીત ત્રણની ધરપકડ કરીને વધુ તપાસ હાથ ધરી છે
