swagat01
ચોમાસાની ઘડીઓ ગણાઈ રહી છે ત્યાં રોડ પહોળા કરવા માટી નાંખતા રોડ બગડશે
શહેરના હાથીજણના લાલગેબી સર્કલ પાસે રોડ પહોળો કરવા માટે તેની પાસે માટીના ઢગલા કરવામાં આવ્યા છે. હવે ચોમાસાની ઘડીઓ ગણાઈ રહી છે ત્યારે તંત્ર દ્વારા રોડ પર માટીના ઢગલા કરાતા સામાન્ય વરસાદમાં પણ અહીંયા કાદવ-કીચડની સમસ્યા સર્જાય તેવી આશંકા છે. જેના લીધે વાહનચાલકોને હેરાનગતિ ભોગવવાનો વારો આવ્યો છે.
આ અંગે સ્થાનિકોના જણાવ્યા મુજબ, હાથીજણના લાલ ગેબી સર્કલ પાસે તંત્ર દ્વારા ડામરનો રોડ અને આરસીસીનો રોડ બનાવ્યો છે. હવે મેઈન રોડ મોટો કરવા માટે બાજુમાં માટીના ઢગલા કરવા માંડ્યા છે. એટલે અડધો સર્વિસ રોડ માટીથી મોટો કરવામાં આવ્યો છે. હવે વરસાદની સીઝન ચાલુ થઈ રહી છે. તો પછી રોડની હાલત શું થશે ? બીજી વાત કરીએ તો બાજુમાં વરસાદી પાણી નિકાલ કરવા માટે ગટર પણ નથી હવે આખા ચોમાસામાં શું હાલત થશે એ જોવાનું રહ્યું.
જો કે રોડ બનાવવા માટે બાજુના લાઈટના થાંભલા કાઢી નાંખ્યા હોવાના લીધે ત્યાં અંધારપટ કરી નાખ્યું છે.
એટલે હાથીજણના લાલગેબી સર્કલ પાસે એક સાંધો ત્યાં તેર તુટી જેવી સ્થિતિ નિર્માણ પામી છે. જેના લીધે વાહનચાલકો અને રાહદારીઓને અવરજવર કરવામાં હાલાકી ભોગવવી પડી રહી છે. હવે રોડની બાજુમાં કરાયેલા માટીના ઢગલા વહેલી તકે હટાવી લેવામાં આવે તેવી લોકો માગ કરી રહ્યા છે.
