swagat01વેચાણ કમ કબજા કરાર કરી ફ્લેટનો કબજો સોંપી દીધો હતો
દાણીલીમડામાં ડેવલોપરને આપેલી જમીન અંગે થયેલા સમજૂતી કરારનો ભંગ કરીને જમીનના માલિક નહી હોવા છતાં એક ફલેટનું તાળુ તોડીને મિલ્કત અન્યને વેચાણ કરાર કરીને આપી દેવા મામલે ચાર વ્યકિતઓ સામે દાણીલીમડા પોલીસ સ્ટેશનમાં ફરિયાદ નોંધાઈ છે.
એલિસબ્રિજમાં રહેતા અબ્દુલકરીમ પટેલે નોંધાવેલી ફરિયાદ મુજબ તેઓ અને કમરઅલી પટેલ બંને આઈકોન એસોસીએટ્સના ભાગીદાર તરીકે કામકાજ કરે છે. 2014માં તેમણે દાણીલીમડામાં નકીઆલમ તિરમીઝી પાસેથી રૂ. 100 રૂપિયાના સ્ટેમ્પ પર દાણીલીમડામાં ટીપી સ્કીમ નં 37 ના સેકટરના 1 ફાઈનલ પ્લોટ નં 93 ની જમીન ડેવલપ કરવા માટે સમજૂતી કરાર કર્યો હતો. જેમાં જે સ્કીમ મુકવામાં આવે તેના સભ્યો પાસેથી બુકીંગની રકમ, જમીનનો ફાળો, બાંધકામ ફાળો, તેમજ મિલકત ડેવલોપમેન્ટ કરવા અંગેની તમામ રકમો આઈકોન એસોસીએટ્સના ભાગીદાર ઉધરાવી શકશે તેવી સ્પષ્ટ બંને વચ્ચે સમજૂતી થઈ હતી.
આમ છતાં નકીઆલમ તિરમીઝીએ એસોસીએટ્સના આઈકોન માલિકોની કોઈપણ પ્રકારની મંજૂરી કે કરાર વિના પોતાની મરજીથી સૈયદ ફિરદોસબાનુ પાસેથી રૂ 20 લાખ લઈને તેમને વેચાણ કમ કબજા કરાર કરી આપ્યો હતો. ગત તા 19 સપ્ટેમ્બર, 2024ના રોજ આ મિલકત જેનો બુકીંગ ઓફિસ તરીકે ઉપયોગ કરતા હતા તેનુ તાળુ તોડીને સૈયદ ફિરદોસબાનુંને કબજો સોંપી દીધો હતો. આ અંગે આઈકોન એસોસીએટ્સના ભાગીદારોએ સ્થળ પર તપાસ કરતા તેમને ફિરદોશબાનુએ આ મિલ્કત પર હવે અમારો કબજો છે તેમ કહીને કેટલાક કાગળોની ઝેરોક્ષ આપી હતી. જે જોતા લખી આપનાર તરીકે નકીઆલમ તિરમીઝી અને લખાવી લેનાર તરીકે સૈયદ ફિરદોશબાનું જણાઈ આવ્યા હતા. તેમાં બે સાક્ષીઓ સહીઓ કરી હતી.
