swagat01મહિલાનો ફોન ઝૂટવવા જતા ધક્કો મારી બે સ્નેચરને પછાડી દીધા
રામોલમાં મહિલા તેના પતિ સાથે વાહન પર પસાર થઈ રહી હતી ત્યારે બાઈક પર આવેલા બે શખ્સોએ મહિલાના હાથમાંથી મોબાઈલ લુંટવાનો પ્રયાસ કર્યો હતો જો કે મહિલાએ પ્રતિકાર કરીને ફોન પકડી રાખી ધક્કો મારતા બંને શખ્સો વાહન પરથી પટકાયા હતા. જે પૈકી એક નાસી છુટયો હતો જયારે એક આરોપીને ઝડપી લેવાયો હતો.
રામોલ વિસ્તારમાં આવેલા પ્રકાશ ટેનામેન્ટમાં રહેતા હંસાબેન વાઢેર પતિ સતીષભાઈ અને બે બાળકો સાથે રહે છે. રવિવારે સતીષભાઈ હંસાબેન અને બાળકોને લઇ બાઇક પર ન્યુ આરટીઓ રોડ પરથી પસાર થઈ રહ્યા હતા. આ સમયે તેમના વાહનની નજીક ટુવ્હિલર પર બે શખ્સો આવ્યા હતા.
તેઓ કશુ વિચારે તે પહેલા બે શખ્સ પૈકીએ એકે હંસાબેનના હાથમાંથી મોબાઇલ ખેંચવાનો પ્રયાસ કર્યો હતો. જો કે હંસાબેને ફોન પકડી રાખ્યો હતો. આરોપીએ ત્રણ વખત મોબાઈલ ખેંચ્યો, પરંતુ હંસાબેનએ પોતાનો મોબાઇલ છોડ્યો નહીં અને સીધો શખ્સને ધક્કો મારી દીધો હતો. હંસાબેનેએ ધક્કો મારતાની સાથેજ બન્ને શખ્સ વાહન સાથે જમીન પર પડયા હતા. બીજી તરફ હંસાબેનનુ ટુવ્હીલર પણ ફંગોળાઈ ગયું. હંસાબેનએ ટુ-વ્હીલરથી ઉતરીને સીધા મોબાઇલ સ્નેચરના વાહનની ચાવી કાઢી લીધી હતી.
મોડીરાતે બનેલી આ ઘટના જોઈને આસપાસના લોકો દોડી આવ્યા હતા અને બન્ને સ્નેચરને ઝડપીને મેથીપાક આપ્યો હતો.આ સમયે એક નાસી છુટયો હતો. બનાવની જાણ થતા રામોલ પોલીસની ટીમ ઘટનાસ્થળે આવી પહોંચી હતી. જ્યા મોબાઇલ સ્નેચરની ધરપકડ કરી હતી. મોબાઇલ સ્નેચરનું નામ સુનિલ ચુનારા છે અને તેના નાસી છુટેલા સાથીદારનું નામ સુમિત ચુનારા હોવાનુ તપાસમાં ખુલ્યુ છે. આ મામલે રામોલ પોલીસ સ્ટેશનના પીઆઇ વી. ડી. મોરીએ જણાવ્યુ છે કે, સુનીલ ચુનારા વિરૂદ્ધ અગાઉ પણ ગુનો નોંધાયા છે.
