swagat01મહિલાઓએ માટલા ફોડીને પાણી આપવા માગ કરી
શહેરના નિકોલ વોર્ડમાં છેલ્લા કેટલાય સમયથી વારંવાર ડ્રેનેજ ઉભરાવાની અને પ્રદૂષિત પાણી આવતા હોવાની ફરિયાદો ઊઠી રહી છે. ત્યારે નિકોલના રહીશોએ તેમની સમસ્યાઓને લઈને સ્થાનિક કોર્પોરેટરના ઘરે જઈને માટલા ફોડીને તેમના હલ્લાબોલ કર્યો હતો. ઘટના અંગે પોલીસને જાણ થતાં પોલીસ પણ દોડી આવી પરિસ્થિતિ વણસે નહીં માટે બંદોબસ્ત ગોઠવી દીધો હતો.
સ્થાનિકોના જણાવ્યા મુજબ, છેલ્લા કેટલાય સમયથી નિકોલ વોર્ડના ગોપાલચોક,એમજી રોડ સહિતના વિવિધ વિસ્તારમાં વારંવાર ગટર ઉભરાવાની અને પીવાના પાણી પ્રદૂષિત આવતા હોવાની સમસ્યાથી લોકો હેરાન થઈ રહ્યા છે. જેના કારણે હરીધામ સોસાયટી અને આસપાસની સોસાયટીની રોષે ભરાયેલી મહિલાઓ સહિતના ટોળાએ માટલા સાથે સ્થાનિક કોર્પોરટર બળદેવ પટેલના ઘરે હોબાળો કર્યો હતો. નિકોલની જલતરંગ સોસાયટી પાસે જ મહિલાઓએ માટલા ફોડીને કોર્પોરેટરના નામનો હુરિયો બોલાવીને હોબાળો મચાવ્યો હતો. જેની જાણ થતા સ્થાનિક પોલીસની ટીમે દોડી આવીને પરિસ્થિતિ સંભાલી હતી.
